மருத்துவமனைத் தள்ளுபடி!

எனது உறவினர் ஒருவருக்குத் திருச்சி மாருதி மருத்துவமனையில் ஒரு அறுவைச் சிகிச்சை நடைபெற்றது. அவர் ஒரு அரசு ஊழியர். அந்தச் சிகிச்சைக்கு ரூ.28,000 மட்டுமே பெற வேண்டும் எனத் தமிழ்நாடு அரசும், மருத்துவமனை நிருவாகமும் ஒப்பந்தம் செய்துள்ளார்கள். ஆனால் மருத்துவமனைக் கேட்ட தொகை 82,000 ரூபாய். இந்த ஒப்பந்தம் குறித்து அறிந்த என் சகோதரர், மருத்துவமனை நிருவாகத்திடம் நியாயம் கேட்டுள்ளார். அவர்களோ அசரவில்லை. பின் கேட்க வேண்டிய விதத்தில் கேட்கவும், நேராக ஒரு அறைக்கு அழைத்துச் சென்று, நீங்கள் 28,000 மட்டும் செலுத்துங்கள். போதும் என்றார்களாம். நியாமான தொகை 28,000. அவர்கள் கேட்டது 82,000. அதிக வித்தியாசம் இல்லை. வெறும் 54,000 ரூபாய் மட்டுமே அதிகம் கேட்டுள்ளார்கள். இதை இன்னொரு விதத்தில் சொன்னால் என் சகோதரருக்கு ரூபாய் 54,000 தள்ளுபடி. எங்குமே கிடைக்காத நவம்பர் மாதத் தள்ளுபடி !